Centro Dramático Galego
Texto, dirección e creación: María Caparrini e Marta Pérez
Elenco: Marta Pérez e María Roja
Té con Kant é un proxecto experimental que conxuga o ensaio filosófico e a creación escénica xogando co humor e a ironía para obter unha peza de teatro próxima ao formato de teatro-didáctico-conferencia.
Johanna Gottfried e Theodora Krauss son dúas mulleres ilustradas chegadas á nosa época nunha viaxe no tempo desde a Prusia do século XVIII. Unha vez aquí tentarán exercer como axitadoras filosóficas coa pretensión de remover e promover a reflexión (e acción) do público asistente ao redor da problemática moral nos nosos días, a partir das ideas do seu amigo o filósofo Inmanuel Kant. A última palabra sobre o destino destas personaxes dependerá unicamente do público asistente que terá que tomar unha decisión seguindo o Imperativo Categórico Kantiano. Atréveste a pensar con elas?
A peza Té con Kant ten un longo percorrido por diferentes teatros e festivais. Foi merecedora do Premio Teatral Maruxa Villanueva para Marta Pérez e recibiu tamén o I Premio do público Coiro de Pita da Sala Ingrávida de Porriño en 2015.
