Autores: Víctor Mosqueira e Josito Porto
Dirección: Víctor Mosqueira
Dous tipos abandonados nas marxes do sistema. Perderon todo e teñen que inventalo todo de novo. Ou, para non viaxar tanto, poden ser marxinais que viven na marxe da nosa sociedade e converten en luxo o noso lixo.
Os clowns, que teñen algo de dibuxo animado (cartoons) no seu modo paródico e eficaz de comportarse, viven rodeados de cartóns, nun mundo de cartón, esa materia valiosísima que, inexplicablemente, nos tiramos ao lixo diariamente.
O cartón serviralles para construír casas, tubaxes do gas, cortinas das xanelas, revisteiro, rolo de papel hixiénico, bandeixas, edredóns, motos, parasol de praia, anteollos, esquís, ponchos, avións, emparrados... en definitiva, todo o que o común da xente vai adquirir a unha coñecida multinacional sueca.
Cartoóns forma parte da celebración do 15º aniversario de Excéntricas (2004-2019) e supón o primeiro espectáculo da compañía para público infantil.