Centro Dramático Galego
Aquellas que no deben morir é un espectáculo que coloca na esfera pública un tema aínda tabú: a morte e a súa xestión privada. Para iso, Las Huecas traballan a partir dos imaxinarios (ás veces precarios) que as xeracións novas teñen sobre os procesos de traspaso.
Desde unha perspectiva política e poética, o espectáculo lanza luz aos abusos da industria funeraria e á capitalización do deceso. Trátase dunha posta en escena a medio camiño entre o teatro documental e a experimentación dos rituais, onde, ademais das performers, interveñen Núria Isern, traballadora do sector funerario e Júlia Sánchez, activista pola soberanía da morte. Aquellas que no deben morir é unha proposta emancipadora porque permite interromper os relatos convencionais sobre o morrer, unha experiencia teatral que se definiu desde a crítica como "algo que non podes nomear, pero que cando estás diante diso, sabes que non o viches antes’’. Espectáculo gañador do premio Apuntador 2021 e premio Novaveu da Crítica.
Las Huecas
Nace no ano 2016 co obxectivo de levar a cabo creacións escénicas desde a práctica colectiva. Como agrupación transitan por todo tipo de identidades: investigadoras etnógrafas, banda de punk ou debuxantes de cómic. Sitúanse nunha estética híbrida; herdeiras da tradición paródica e satírica catalá, influenciadas polas propostas do teatro documental, polas teatralidades visuais e do obxecto e, finalmente, polas experiencias liminares da performance. Traballan a partir dun carácter netamente investigador a noción de performatividade "da retirada’’, a vulnerabilidade dos corpos, os xogos febles dos códigos teatrais, o xogo de máscaras das identidades individuais, a dramaturxia permanente e fragmentaria así como a abolición das estruturas xerárquicas na creación.
