CDG: Novas

Novas

TEATRO, MÚSICA EN VIVO E DANZA ÚNENSE NESTE ESPECTÁCULO, ONDE OS PERSONAXES SE DEBATEN ENTRE A OBSESIÓN POR RECORDAR E A IMPORTANCIA DE ESQUECER

Voadora en coprodución co CDG estrea no Salón Teatro "Super8", unha comedia musical sobre a memoria

[07/04/2010] A plataforma Voadora estrea este venres 9 ás 21.00 horas no Salón Teatro de Santiago o espectáculo Super8, unha comedia musical realizada en coprodución co Centro Dramático Galego (CDG) da que ofrecerá outras dúas funcións na fin de semana (sábado 10 ás 20.30 h e domingo 11 ás 18.00 h). Teatro, música en vivo e danza únense para dar forma a unha montaxe que, partindo do cine como metáfora da memoria e da memoria como teatro do vivido, xira arredor duns personaxes que se debaten entre a obsesión por recordar e a importancia de esquecer.

A DERRADEIRA FUNCIÓN DA MONTAXE DIRIXIDA POR XÚLIO LAGO, A PARTIR DA OBRA DE ROBERTO VIDAL BOLAÑO, TERÁ LUGAR O VINDEIRO SÁBADO 3 DE ABRIL ÁS 20.30 HORAS

O espectáculo do CDG "As actas escuras" pecha en Ferrol unha xira que xa cogregou 4.250 espectadores

[31/03/2010] O Teatro Jofre de Ferrol acolle o vindeiro sábado 3 de abril ás 20.30 horas a derradeira función do espectáculo do Centro Dramático Galego (CDG) As actas escuras, pechando así unha xira que ata o momento congregou 4.250 espectadores en sete escenarios galegos. En total, serán 27 as representacións que a compañía pública terá ofrecido desta obra de Roberto Vidal Bolaño, recuperada para os escenarios da man do director Xúlio Lago e dun elenco de 14 recoñecidos actores e actrices.

CATRO FADISTAS CANTAN "Á DESGARRADA" O SÁBADO 27 ÁS 20:30 H

O Salón Teatro de Santiago transfórmase nunha casa de fados para acoller o espectáculo portugués inspirado no filme de Carlos Saura

[25/03/2010] O Salón Teatro de Santiago acolle este sábado 27 ás 20.30 horas a actuación de Casa de Fados, unha iniciativa musical na que concorren diferentes instrumentistas e cantantes, primeiras figuras do fado xunto a novas promesas recoñecidas como herdeiras de voces como Amália Rodrigues ou Carlo do Carmo. Esta formación portuguesa, consolidada como unha das máis relevantes no seu xénero, presenta no espazo escénico que xestiona o Centro Dramático Galego (CDG) Em concerto , o seu primeiro traballo discográfico gravado en directo durante as súas xiras.

O CONSELLEIRO DE CULTURA E TURISMO ASISTIRÁ Á REPRESENTACIÓN DO DOMINGO, COINCIDINDO COA CONMEMORACIÓN ESTA FIN DE SEMANA DO DÍA MUNDIAL DO TEATRO

A xira do espectáculo do CDG "As actas escuras" recala en Ourense con dúas funcións no Teatro Principal

[25/03/2010] O Teatro Principal de Ourense acolle este sábado 27 de marzo ás 20.30 horas e o domingo 28 ás 19.00 h senllas funcións da última produción do Centro Dramático Galego (CDG), As actas escuras, obra de Roberto Vidal Bolaño que a compañía pública recuperou para os escenarios da man do director Xúlio Lago e dun elenco integrado por 14 recoñecidos actores e actrices. Con ocasión da representación deste espectáculo na fin de semana na que se conmemora o Día Mundial de Teatro, o conselleiro de Cultura e Turismo, Roberto Varela Fariña, ten previsto desprazarse até Ourense o próximo domingo para asistir ao segundo dos pases que o CDG ofrecerá na cidade.

O CANTAUTOR OURENSÁN INTERPRETARÁ OS TEMAS DE "INTERIOR", O SEU TERCEIRO DISCO, A PARTIR DAS 20.30 H

Continúa o programa "ST Música Presente" cun concerto de Emilio Rúa o día 26 no Salón Teatro

[24/03/2010] O cantautor ourensán Emilio Rúa ofrecerá un concerto o vindeiro venres día 26 ás 20.30 horas no Salón Teatro de Santiago como parte do programa "ST Música Presente", no marco do que presentará Interior, o seu terceiro traballo discográfico que sae ao mercado esta mesma semana. Como no resto dos directos inseridos neste ciclo que promove a Consellería de Cultura e Turismo a través da AGADIC (Axencia Galega das Industrias Culturais), esta actuación congregará público especializado -programadores, promotores de festivais e certames de música, distribuidores, prensa especializada e outros axentes culturais- e abrirase tamén ao resto de espectadores interesados, en función do aforo dispoñible.

Anteriores | 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 | 133 | 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 | Seguintes

Accesibilidade | Aviso legal