Centro Dramático Galego
[01/06/2006] O Teatro Jofre de Ferrol acollerá os días 2 e 3 de xuño, ás 20.30 horas, as dúas últimas funcións do espectáculo Illa Reunión, do Centro Dramático Galego (CDG), coas que rematará un período de exhibición de tres meses durante o que esta produción terá sido representada nun total de 7 escenarios galegos ante máis de 3.000 espectadores.
A directora Ana Vallés utilizou o concepto de viaxe e o mito do viaxeiro como punto de partida para a creación colectiva desta montaxe, que utiliza a fragmentación como técnica narrativa, ao tempo que explora as múltiples posibilidades expresivas do teatro, a danza e a música.
A acción desenvólvese nun espazo escénico diáfano, que ten a súa principal vestimenta nos diversos matices da luz creada por Baltasar Patiño e no especial plano sonoro que aporta a música en directo dos instrumentos de vento (bombardino, trompeta, tuba) e de percusión que empregan músicos e actores. Integraron tamén o equipo artístico Marina Wainer, axudante de dirección e deseñadora do vestiario xunto a Ana Vallés; Santi Mañasco, auxiliar de dirección, e Luis Soto, encargado dos arranxos musicais.
