AGADIC

Centro Dramático Galego


Novas

ESTE SEGUNDO ENCONTRO DO CURSO "PISTAS PARA UNHA DRAMATURXIA DA ACTUALIDADE III" CELÉBRASE NO SALÓN TEATRO DE SANTIAGO DO 19 AO 23 DE XANEIRO

O autor asturiano Maxi Rodríguez imparte un obradoiro de escrita teatral no Centro de Creación Dramática do CDG

[16/01/2009] O Centro de Creación Dramática Contemporánea do Centro Dramático Galego (CDG) acolle a partir do luns 19 o segundo dos catro obradoiros que conforman o curso de escrita teatral Pistas para unha dramaturxia da actualidade III, impartido polo dramaturgo asturiano Maxi Rodríguez e supervisado por Cándido Pazó. Un grupo de 12 alumnos seguirá esta actividade, que se desenvolverá na biblioteca do Salón Teatro até o venres día 23 en horario de 17.00 a 20.00 h.

Pistas para unha dramaturxia da actualidade componse de catro obradoiros dunha semana de duración cada un, nos que, a partir da identificación e do estudo dos múltiples temas que poden definir a actualidade, son rastrexados e experimentados os distintos enfoques, estratexias e camiños dramatúrxicos para abordalos. Así, ademais de Cándido Pazó e Maxi Rodríguez, o francés Enzo Cormann, responsable do departamento de escritura dramática na Escola Nacional Superior das Artes e Técnica do Espectáculo (ENSATT), impartirá un terceiro obradoiro que terá lugar do 23 ao 27 de febreiro. Finalmente, do 30 de marzo ao 2 de abril está previsto o taller da británica Elyse Dodgson (Reino Unido), directora asociada e xefa do departamento internacional do Royal Court Theatre de Londres.

Durante a súa estadía no Centro de Creación Dramática, os alumnos están a escribir un texto breve que vai tomando forma segundo se desenvolven a totalidade dos obradoiros. Para este fin, Cándido Pazó, como director do curso, estableceu un período de seguimento presencial e a distancia dos traballos dos alumnos, posterior á celebración de cada un dos talleres. Ao remate do curso, o CDG organizará unhas lecturas dramatizas baixo o título "Lecturas en acción" cunha selección dos textos xurdidos desta experiencia.

Traxectoria profesional

Autor teatral, guionista, director e actor, Maxi Rodríguez (Mieres, 1965) leva estreadas e publicadas numerosas pezas de teatro en España, Portugal e América Latina, entre as que destacan ¡Oé, Oé, Oé...! -que en Galicia foi levada a escena por Roberto Vidal Bolaño- ou Enma. Recibiu numerosos galardóns, como o Premio Marqués de Bradomín 1989 con El color del agua; o Premi Borne de Teatro 1987 con El mío coito o la épica del BUP, ou o Premio Jovellanos 1983 con El lóbulo y las orejas.

En 1989 crea a compañía profesional Producciones Toaletta coa que pon en escena un extenso repertorio de obras propias (Ondas, Tris/Travel, The Curran 3, Píldoras de cabaret, ¡Oé, oé, oé!...) ao tempo que imparte cursos de formación teatral por toda a xeografía estatal, ademais de colaborar en diversas publicacións e en montaxes doutras compañías.


AGADIC Marca gráfica da Xunta de Galicia

Accesibilidade | Aviso legal