AGADIC

Centro Dramático Galego


Novas

DESPOIS DE 30 ANOS DE SILENCIO MUSICAL, REAPARECE ARROUPADA POR UNHA NOVA XERACIÓN DE MÚSICOS COMO DEVENDRA BANHART, JOANNA NEWSOM OU ANIMAL COLLECTIVE

A cantautora folk británica Vashti Bunyan clausura no Salón Teatro a extensión en Santiago do Festival Sinsal

[11/05/2010] O Festival Sinsal pecha mañá a cuarta edición da súa extensión en Santiago de Compostela co concerto que ofrecerá Vashti Bunyan a partir das 22.00 horas no Salón Teatro. Na que é a súa primeira actuación en Galicia, a cantautora folk inglesa repasará os temas que marcaron a súa particular traxectoria profesional, que retomou tras 30 anos de silencio arroupada por unha nova xeración de músicos como Devendra Banhart, Joanna Newsom ou Animal Collective, entre outros.

Vashti Bunyan

O caso de Vashti Bunyan (Londres, 1954) é unha estraña illa na historia da música popular, pois despois de publicar con escaso éxito o seu primeiro disco, decidiu retirarse durante décadas ata que, redescuberta por destacados artistas do actual panorama folk norteamericano, regresa aos estudios de gravación e aos escenarios.

Vashti comezou a dedicarse á música tras unha viaxe aos Estados Unidos a mediados dos sesenta, onde entrou en contacto coa obra de Bob Dylan e outros cantautores. Á súa volta ao Reino Unido é descuberta polo manager dos Rolling Stones, e comeza a gravar singles con cancións alleas máis algunha propia.

Artista de culto

En 1970 edita o que será o seu primeiro álbum, Just Another Diamond Day, sen sorte na venda e axiña descatalogado. Pasa os seguintes trinta anos vivindo no anonimato da súa familia mentres o seu disco vai pasando de man en man, medrando aos poucos e ás súas costas ata que, a partir do ano 2000, esperta o interese de músicos como Devendra Banhart ou Joanna Newsom, que falan dela como a súa artista de referencia.

Comeza o seu regreso á música colaborando con Piano Magic, Animal Collective ou o propio Devendra Banhart. Xa en 2005, ve a luz o seu segundo disco Lookaftering, unha presada de novas cancións que afondan no seu estilo sinxelo e na súa voz doce e delicada. Este traballo, editado no selo independente Fat Cat Records, describe precisamente todo o que aconteceu na súa vida durante este impás: fillos, amigos, amantes, natureza e varios cambios máis. Rodeada de colaboradores como Banhart, Adem, Adam Price, Kevin Barker, Joanna Newsom, Otto Hauser, o arranxista e produtor Max Richter e vellos coñecidos como Robert Kirby, Vashti concibiu un disco delicado e austero. Nesta ocasión, a instrumentación, ademais de guitarra acústica, abrangue piano, dulcimer, arpa, oboe e glockenspiel (unha especie de pequena marimba). Tras percorrer Europa, Norte América, Australia e Xapón presentando este disco, en 2007 publica Some Things Just Stick in Your Mind, unha compilación de singles e demos gravados entre 1967 e 1969.

As entradas para o concerto de Vashti Bunyan poranse á venda no despacho de billetes do Salón Teatro mañá mércores a partir das 20.00 horas. Ademais, xa poden adquirirse por adiantado na billeteira electrónica da web www.caixagalicia.es e a través do teléfono 902 43 44 43. O prezo das localidades é de 10 euros (cun desconto do 40% para estudantes, xubilados, usuarios do carné xoven e desempregados).

Esta actuación clausura a programación musical inserida dentro da cuarta edición da extensión en Santiago do Sinsal, un encontro de referencia en Galicia para a música contemporánea máis vangardista, que no que vai de ano xa presentou no Salón Teatro ao cuarteto xaponés Mono e á cantante arxentina Juana Molina.

Ligazóns


AGADIC Marca gráfica da Xunta de Galicia

Accesibilidade | Aviso legal