AGADIC

Centro Dramático Galego


Novas

O DIRECTOR E ACTOR GALEGO, CON AMPLA EXPERIENCIA NA ESCENA FRANCESA, AFONDARÁ NAS CLAVES PARA A CONSTRUCIÓN DOS PERSONAXES CREADOS POLO GRAN COMEDIÓGRAFO

A interpretación no teatro de Molière centra o curso do CDG que imparte desde hoxe Mario Tomás

[14/02/2011] Unha decena de actores e actrices asiste desde hoxe ao curso sobre Molière que, organizado polo Centro Dramático Galego (CDG), imparte en Santiago o director, intérprete e dramaturgo galego Mario Tomás. Esta actividade docente, que se desenvolve ata o vindeiro 24 de febreiro na sala de teatro Roberto Vidal Bolaño da Universidade de Santiago, enmárcase dentro do novo programa de formación continua para profesionais da escena impulsado pola compañía pública, despois dunha primeira experiencia desenvolvida o pasado mes de setembro co encontro sobre o teatro de Shakespeare a cargo de Alfredo Padilla.

Inauguración do curso de Moliére

Durante as primeiras xornadas do curso, o alumnado realizará unha pequena aproximación á obra de Molière, centrándose especialmente no seu xeito de actuar. Así, o primeiro texto que se abordará será Jorge Dandin, no que o propio comediógrafo francés amosa as claves da súa interpretación.

Xogo barroco
Os participantes deberán escoller algunha das escenas que se facilitarán das pezas Escola de mulleres, Don Juan, Tartufo, O enfermo imaxinario, O misántropo ou Jorge Dandin. A continuación, unha parte das sesións estará dedicada á observación e toma de conciencia do instrumento de traballo mediante exercicios de sensibilización e tonificación, prestándolle un interese especial á respiración. A través do xogo barroco de Molière, indagarase na súa comicidade desde o xesto, a situación, as palabras e os carácteres dos personaxes. Ademais, tomando pequenas escenas que se afinarán día a día, faranse evidentes as influencias de Plauto e da commedia dell’arte italiana nos textos.

A medida que avancen as clases, abordaranse así mesmo a calidade de escoita, o ritmo diexético das escenas, a importancia dos obxectos, as relacións xerarquizadas dos personaxes, o paralelismo da obra coa nosa realidade. Estudarase como achegarse ao texto de xeito que non supoña un constrinximento para o actor/actriz a hora de considerar o xogo escénico. Finalmente realizarase unha pequena mostra aberta (work in progress), resumo dun obradoiro para o que se contou co asesoramento de Luís D’Ors, actual coordinador do centro de estudos do Teatro de la Abadía e director escénico da compañía Míjael Chéjov.

Mario Tomás
Director, actor e dramaturgo galego, Mario Tomás (na imaxe, xunto á directora do CDG, Blanca Cendán, na inauguración do curso) posúe unha ampla formación e experiencia no eido do teatro francés. Durante a súa traxectoria profesional participou en máis de corenta montaxes, interpretando personaxes como Argan (en El enfermo imaginario, Cía. La Espada de Madera, 1995-1997) ou o propio Molière nunha montaxe sobre a vida do autor francés.

Entre 1992 e 1997 formou parte do elenco de a Troupe de l’Epée de Bois na Cartoucherie de París (amadriñada por Arianne Mnouchkine) e foi cofundador do grupo La Espada de Madera (Madrid, 1993), co que colabora ata 1998. En 2006 instálase en Galicia e funda a compañía Tirititempo, dirixindo e interpretando as montaxes A historia máis prodixiosa (2006), Os tres porquiños e algún outro (2007), Sete-sete, cabaleiro de Albacete (2008) e Osofete (2010).


AGADIC Marca gráfica da Xunta de Galicia

Accesibilidade | Aviso legal