[20/04/2011] O Centro Coreográfico Galego (CCG) organiza a I Mostra de Danza de Galicia, que se desenvolverá durante a próxima semana en Santiago de Compostela cunha carteleira artística de 37 compañías galegas de todos os estilos. O Salón Teatro e a praza de Cervantes serán os escenarios desta programación que se estenderá do martes 26 ao sábado 30 de abril, coincidindo coa conmemoración do Día Internacional da Danza.
Programadores, distribuidores e produtores, entre outros axentes culturais, están convidados a participar nesta iniciativa, que ten como principal obxectivo reflectir diante do público o dinamismo coreográfico de Galicia, poñendo en valor a artistas tanto emerxentes como xa consolidados que desenvolven aquí o seu traballo.
Ademais das creacións apoiadas polo CCG a través do seu programa de Proxectos de Investigación Coreográfica, tamén teñen cabida outras pezas interpretadas por compañías profesionais, grupos de danza ou asociacións que empregan o baile como instrumento para a integración e a concienciación social. En cada xornada tamén haberá tempo para o intercambio de experiencias entre os creadores.
Durante os cinco días que durará este encontro, o Salón Teatro amosará unha sucesión de máis de 20 pezas, cada unha delas duns 30 minutos de duración, levadas a cabo por unha ampla representación de compañías, intérpretes e creadores galegos. Durante as mañás, a Mostra ocupará tamén a praza de Cervantes, nun emprazamento aberto aos viandantes e no que participarán 10 formacións artísticas.
Variedade de propostas
A variedade das propostas porase xa de manifesto na xornada inaugural deste programa que terá lugar o martes 26 a partir das 17.00 horas. Trala actuación do grupo de música tradicional da Agadic (Axencia Galega das Industrias Culturais), a compañía de danza Entrecaixas porá en escena un fragmento da súa peza Miniaturas, de Iván Villar. A forza e a fluidez de movementos, combinados coa música de carácter tradicional interpretada polo grupo Taratrío, mestúranse neste espectáculo no que o grupo formado por antigos membros do desaparecido Baller Galego Rey de Viana realiza un percorrido polos diferentes ritmos amosando a súa particular visión sobre a danza tradicional galega.
A continuación, o folclore árabe presentarase na Mostra da man de El Portsaidi. Sueño de ciego é o nome da coreografía de Gamal Aboegela, a partir de sons da música tradicional exipcia. As bailarinas e coreógrafas Paula Quintas e Marta Alonso, de CF-dance, tomarán o relevo e desenvolverán a performance de danza contemporánea 10 gr por cada 180 ml de agua.
A compañía Lusco e Fusco pechará esta primeira xornada coa escenificación de Encontros, un espectáculo multidisciplinar onde o teatro físico, a danza e o novo circo se conxugan para crear un código propio de expresión. Pablo Reboleiro e Alfredo Muíño son os artífices desta obra, para a que contan coa colaboración dos bailaríns Alexis Fernández e David Loira como asistentes de coreografía.
Entradas á venda
As entradas para asistir aos diferentes espectáculos poranse á venda no despacho de biletes do Salón Teatro, que permanecerá aberto todos os días da Mostra. Ademais, poden adquirirse por anticipado na billeteira electrónica da web www.sientelaunion.es e do teléfono 902 43 44 43. O prezo das localidades é de 5 euros e tamén está dispoñible un bono para todos os espectáculos ao prezo de 20 euros.