Centro Dramático Galego
Dirección: Jana Pacheco
Autoría: Fátima Delgado
Alba é unha atleta de éxito que loita por conseguir a vitoria e adestra duro para iso. É a favorita ao podio, pero a súa carreira verase truncada por un feito inesperado. Uns meses antes dos Xogos Olímpicos, a deportista é apartada da competición oficial.
Para Alba correr é respirar e, nese momento, o seu mundo derrubouse. Acompañada pola súa inseparable adestradora verase nunha encrucillada na que loita por cumprir o seu soño sen renunciar ao seu verdadeiro ser.
Escrita por Fátima Delgado e dirixida por Jana Pacheco, Run baby run está inspirada nos casos dalgunhas atletas que sufriron discriminación de xénero dentro do deporte. Unha reflexión sobre canto se pode chegar a loitar por cumprir o teu soño estando en xogo o traizoar os teus propios principios e renunciar ao teu verdadeiro ser.
Esta coprodución entre o TEATRO ESPAÑOL, CENTRO DRAMÁTICO GALEGO, MENINAS TEATRO e PROVERSUS conta coa colaboración de Turismo de Galicia e co apoio da Comunidade de Madrid que concedeu unha Axuda á Creación e ao desenvolvemento das Artes Escénicas coa que a dramaturga Fátima Delgado escribiu o texto en 2018.
