A coprodución luso-galega 'Frágua de amor' abre a carteleira do Centro Dramático Galego para o novo ano no Salón Teatro

O Salón Teatro, sede do Centro Dramático Galego en Santiago de Compostela, abre a súa programación de 2025 volvendo ser un dos escenarios do ciclo de teatro en lingua portuguesa Quintas do Camões, promovido polo Instituto Camões-Centro Cultural Portugués en Vigo. Así, este venres 10 de xaneiro ao 20,00 h. o espazo ofrece en función única a montaxe Frágua de amor, o clásico da literatura portuguesa escrito polo dramaturgo Gil Vicente, coproducida pola compañía pública galega xunto a seis estruturas culturais lusas: Escola da Noite-Grupo de Teatro de Coimbra, Ou Bando de Surunyo, Artway, Cendrev-Teatro García de Resende, Teatro Académico de Gil Vicente e Teatro Nacional São João.

A peza está dirixida por António Augusto Barros e conta coa música en directo do Bando do Surunyo, especializado na interpretación de obras dos séculos XVI e XVII, con seis voces, laúde, viola de gamba, frauta e percusión baixo a dirección musical de Hugo Sanches e co galego Xurxo Varela a viólaa. Sobre o escenario actuará un elenco de nove actores e actrices: Ana Teresa Santos, Carlos Meireles, Igor Lebreaud, Maria Quintelas, Miguel Magalhães, Nuno Meireles, Sérgio Ramos e a galega Mónica Camaño. 

Crítica dos privilexios e os abusos

A posta en escena do texto escrito en 1524 para celebrar o casamento de João III con Catarina de Habsburgo consegue, a través da escenografía e da música, o ambiente de festa imaxinado por Gil Vicente. Con todo, tamén lanza miradas críticas aos temas habituais do autor: a igrexa, a xustiza corrupta e a fidalguía improdutiva que aspira a beneficios.

Tras a súa estrea en Coimbra e o seu paso por Évora o pasado novembro, Frágua de amor chega agora a Galicia antes de recalar no Teatro Nacional São João do Porto, onde se vai a representar do 15 ao 18 de xaneiro. Para a representación no Salón Teatro, as localidades poden adquirirse xa de maneira anticipada na plataforma en liña de ataquilla, ou no portelo do número 34 da rúa Nova compostelá o venres 10 a partir do 18,00 h.

Ademais, o Camões ofrece un servizo de autobús gratuíto desde Vigo, con saída ao 17,00 h. desde o Berbés, ata Santiago de Compostela (dársena de La Salle), con regreso incluído e paradas diante da Escola Oficial de Idiomas de Pontevedra e da de Vilagarcía de Arousa. Para facer uso deste transporte fai falta inscribirse ata mañá 8 de xaneiro a través da web do centro luso.

Estreitar lazos co teatro portugués

Un ano máis, a unidade teatral da Xunta de Galicia colabora coa iniciativa Quintas do *Camões co obxectivo de poñer o foco nas raíces comúns dos idiomas galego e portugués, así como de estreitar lazos entre o teatro e a cultura de ambos os países.

Nos últimos anos a unidade teatral da Consellería de Cultura, Lingua e Xuventude colaborou con estruturas públicas e compañías portuguesas dentro do seu obxectivo de servir de ponte entre profesionais das dúas beiras do Miño. Así, en novembro de 2023 produciu xunto co Teatro do Noroeste-Centro Dramático de Viana, o Teatro Nacional Dona Maria II de Lisboa e o Teatro Nacional São João  de Porto Manuela Rey Is In Da House. En 2024 viron a luz as coproducións Territórios de libertdade, coa compañía galega Tanxarina Monicreques e a portuguesa Varazim Teatro e Entrepalav-bras, da galega ButacaZero en alianza coa lusa TEatroensaio. Ademais, dentro deste mesmo ciclo  Quintas do Camões representouse a peza Salgueiro Maia: cartografía de um monólogo, de Teatro do Noroeste - Centro Dramático de Viana.

Dentro desta cooperación enmárcanse tamén os traballos desenvolvidos ao amparo do proxecto europeo Nós/Nous, que impulsa a promoción profesional e a internacionalización do alumnado de arte dramática ao final da súa carreira académica e que posibilitou a finais do ano pasado as montaxes de Na hora dúas cans e Ifixenia .