Clásicas desfeitas vol. 13 | Medea–Mamá–Monstro

Helena Varela é actriz, formadora, produtora, distribuidora e lectora de audiolibros para a ONCE. Diplomada en dobraxe pola Escola de Salvador Arias (Madrid), titulada en Arte Dramática pola ESAD de Galicia no ano 2009 e Máster en Artes Escénicas pola Universidade de Vigo (2010). No 2015 funda co artista e enxeñeiro Xosel Díez o colectivo Cinema Sticado. Actualmente imparte obradoiros dentro de diferentes programas de igualdade no territorio galego.

Recibiu, con Cinema Sticado, en 2017 o premio Innovative Approach to Puppetry Animation Award (Premio ao achegamento máis innovador ao arte do teatro de monicreques) dentro do Festival AnimArt en Łódź (Polonia). En 2021, o premio do XXVI International Puppet Theatre Festival “Three are too many, two are not enought”, e o “Premio a Innovación tecnolóxica no desenvolvemento dunha nova linguaxe escénica” (Bulgaria). En 2022, o Premio especial do xurado no Festival Internacional de Maltepe (Turquía).

Laura Porto é dramaturga, xestora cultural, produtora e escritora. Grao en Arte Dramática pola ESAD de Galicia (2019), remata os seus estudos con matrícula de honra no Traballo de Fin de Grao. Cursa estudos de Filosofía na USC. Fórmase actualmente como T.S. en Mediación Comunicativa.

Desenvolve a súa actividade laboral nos ámbitos das artes escénicas, o xornalismo, a xestión cultural e a acción social. Traballa desde 2019 como dramaturga, directora e asesora freelance para diferentes compañías de Galiza e Portugal.

En 2022 foi seleccionada para a II Residencia literaria Cidade da Cultura, en 2023 no I Laboratorio de creación SGAE Galicia, e resultou finalista en 2024 aos Premios María Casares, na categoría “mellor texto orixinal”, polo seu texto A Nai. En 2024 comeza a coordinar o suplemento cultural “Bisbarras”, que se publica quincenalmente no Faro de Vigo; e asume a dirección do programa de residencias artísticas Artistea.