Clásicas desfeitas vol. 9 | Hamlet, o de Cunqueiro

Hamlet, o de Cunqueiro está inspirada na obra O incerto Señor Don Hamlet de Álvaro Cunqueiro. Hibrídase coas obras A cartomante, de Machado de Assis e máis Hamlet, de William Shakespeare. Versionada para Clásicas desfeitas, esta peza mestura o mundo teatral co interactivo do xogo. Ademais, mestura a cultura galega coa brasileira. O espectáculo combina elementos dunha peza teatral coas técnicas dun videoxogo, interactivo co público. Este pasa a ser xogador e forma parte da peza tentando desvelar os enigmas que se presentan ao comezo do espectáculo. Dividida en nove escenas, os actores xunto co público, percorreran diferentes espazos no que terá lugar a representación. Será na última localización na que o público descobre toda a verdade.
 

Adaptación, dirección artística e deseño interactivo: Beatriz Legerén e Antonio Pena (Grupo de innovación docente ComTecArt da UVigo)

O espectáculo pretende unha mestizaxe entre dúas disciplinas aparentemente inconexas: o teatro e os videoxogos.

Esta proposta multidisciplinar fai, tamén, mestura da cultura galega e a brasileira usando como vehículo un extracto dunha obra do galego Álvaro Cunqueiro, O incerto señor don Hamlet, que se hibrida co relato A cartomante, do escritor brasileiro Machado de Assis, máis unha aparición invitada collida directamente da obra orixinal de Shakespeare.

A personaxe da Cartomante, unha figura típica no imaxinario brasileiro como nexo entre a realidade e outros mundos, fai de elemento revelador dos enigmas que se presentan, sobre o amor, a morte e a familia.

Unha proposta sempre variante, onde cada representación pode revivir unha resposta distinta a esas tres incógnitas que atormentan a un Hamlet dubidoso. O público participa directamente na obra, onde a música e o xogo teñen un papel relevante.

Os escenarios son as mesmas entrañas da Cidade da Cultura, nas galerías subterráneas, o que reforzará a sensación de circular por un mundo decadente, morto pero vivo, onde o propio público fará o papel dun Coro clásico, como aparece na obra de Cunqueiro.