Dolce far niente

Colectivo Desattada, gañador do Xuventude Crea Teatro 2025

O Colectivo Desattada, formado por Jorge Destar, Ana Oca e Lucía Satta, desenvolveu o proxecto co que resultou gañador do Xuventude Crea Teatro 2025, nun ano marcado pola creación, a formación e a apertura de novas vías de colaboración.

Ao longo de varios meses, o colectivo participou en diferentes accións vinculadas ao Centro Dramático Galego (CDG), entre elas o avance na coprodución do espectáculo Dolce far niente, a partir do proxecto co que gañaron o Xuventude Crea 2025. A estrea está prevista para o 11 de outubro de 2026 no Salón Teatro de Santiago de Compostela.

O proxecto formou parte tamén das Residencias Descartes, desenvolvidas coa Cidade da Cultura de Galicia, ofrecendo ao colectivo un espazo para a investigación e o desenvolvemento dos seus procesos creativos.

A dimensión internacional foi outra das pezas fundamentais deste percorrido. Desattada participou na Academia da Unión de Teatros de Europa, xunto con mozos e mozas de sete países, nun programa de formación e creación desenvolvido en Roma, Praga, Sofía e Salónica.

Durante este proceso traballaron con profesionais de recoñecido prestixio internacional, entre eles Luca Di Fuccio, director do Teatro Nacional de Roma; Carme Portaceli, directora do Teatre Nacional de Catalunya; e Florian Hirsch, dramaturgo do Teatro Nacional de Luxemburgo. A Academia estivo coordinada por Nuno Cardoso, exdirector do Teatro Nacional São João.

Como peche deste proceso, en Salónica, o colectivo presentou unha pequena mostra escénica resultado do traballo desenvolvido durante a Academia, á que asistiu tamén o director do Centro Dramático Galego.

Un percorrido que sitúa o talento novo galego en diálogo con creadoras e creadores de diferentes países e que continúa a abrir camiños para a creación escénica contemporánea.