O péndulo

A dramaturxia de O Péndulo, realizada a dúas mans entre Marta Pérez e Ernesto Is, naceu pola proximidade emocional que Marta ten coa propia historia que se conta. Falamos dunha peza próxima ao teatro documental e ao teatro verbatim, na que empregamos mecanismos propios da autoficción para a elaboración da dramaturxia. A obra susténtase nos diferentes xogos de traballo actoral que fan que cada unha das actrices pase por diferentes personaxes. Tamén nos feitos históricos narrados polas tres actrices que se amosan a través dos diferentes documentos orixinais, fotografías e vídeos que se empregan durante a obra. As actrices oscilan constantemente entre ser elas mesmas e representar outras personaxes. Desde a distancia de Ernesto conséguese que a peza obteña a obxectividade necesaria para elaborar unha historia que, ainda persoal e íntima, conseguise tamén a universalidade necesaria para poñernos fronte a unha memoria común e colectiva e sucesos que aconteceron con similitudes en diferentes puntos de Galicia e do estado español.