Profetas

Ernesto Is (Xixón, 1988). Dramaturgo e creador teatral. Titulado en Dirección Escénica e Dramaturxia pola ESAD de Galicia e técnico de Realización e Produción Audiovisual. Amplía a súa formación coa asistencia a cursos de destacadas profesionais como Paula Carballeira, Alfredo Sanzol, Bárbara Colio, Antonio Rojano ou Sergio Blanco.

En 2016, gaña ex aequo o Premio «Abrente» da MIT de Ribadavia con Fendas. En 2017, obtén o Premio «Rafael Dieste» da Deputación da Coruña con Despois das ondas, monólogo sobre a actriz María Casares polo que foi finalista na categoría de mellor texto orixinal nos XXIV Premios «María Casares» da Asociación de Actores e Actrices de Galicia. Volve gañar o «Abrente» con Profetas en 2021. No ano 2023, acada con Memoria de la nisal o Premio «Asturias Joven» de Textos Teatrais do Instituto Asturiano da Xuventude.

Participa no Programa de «Dramaturgias Actuales» do INAEM en 2017, dando como resultado a peza El hombre que soñaba con elefantes en las estrellas. En 2018, forma parte do grupo «DramaturXa» do Centro Dramático Galego, no que escribe Onde veñen morrer as baleas. En 2020, os teatros de Euskadi seleccionan o seu proxecto Canciones amarillas, flores tristes no programa «Antzerkigintza Berriak» de novas dramaturxias. En 2021, desenvolve a peza Relato para un incendio grazas á primeira bolsa de «Dramaturxia e creación» convocada pola Axencia Galega das Industrias Culturais.

Escribe para as compañías Feira do Leste (Exilio das Moscas e Tras Tannhäuser —axudas á «Creación Joven» do INJUVE—), Señora Supina (Hotel Europa) e Inversa Teatro (O Péndulo, coautoría con Marta Pérez). En 2024, funda a compañía Manekineko xunto á actriz e directora Nerea Brey, coa que estrean Cancións amarelas, flores tristes.

Na actualidade, compaxina o seu traballo creativo coa docencia en diferentes colectivos e institucións. Colabora ou colaborou coa Revista Galega de Teatro, a revista de ocio cultural A Movida e o programa Zigzag Diario da Televisión de Galicia.