Punto en boca: entre fíos anda o lío

Raquel Crespo, creadora e intérprete de Punto en Boca, natural de Culleredo, descubriu a paixón polo teatro e a danza desde moi nova grazas á Compañía El Ruiseñor. En 2019 obtivo o título en Teatro Xestual pola Escola de Arte Dramática de Galicia.

No seu percorrido como actriz, destacou en producións como Serva me, Servabo te de Prácido Domingo, en coprodución co Centro Dramático Galego, ou pezas como 5 mulleres que comen tortilla e Hotel Europa da Cía Señora Supina e Cubo de Elefante Elegante. Recentemente, traballou en proxectos destacados como Manuela Rey is in da House, unha coprodución galego-portuguesa do CDG, e actualmente en Alta Costura de Elefante Elegante.

Raquel Crespo emprega a súa experiencia persoal no mundo da costura para dar vida a unha obra que explora a creación como acto artesanal e escénico. No escenario, reconstrúe, a través do corpo e da voz, a memoria colectiva das persoas que, cosendo, tamén teceron historias. Teatro, oficios e tradición danse a man para contar unha historia que conecta o pasado e o presente.

Susana Crespo é unha creadora escénica galega cunha traxectoria singular que entrelaza a interpretación teatral co deseño de vestiario e a pedagoxía artística. Filla de emigrantes galegos e asturianos, criouse en Londres, onde o teatro formaba parte da educación escolar. Alí descubriu a súa paixón polas artes escénicas e o deseño de vestiario, influenciada por docentes que lle transmitiron o amor pola arte e a literatura. Especializada en deseño de moda, patronaxe e confección industrial, funda no ano 2006, xunto con Fernando Moares a compañía e escola de teatro amador El Ruiseñor en Culleredo, un proxecto que combina formación teatral e creación escénica.

Susana Crespo escribiu e dirixiu numerosas obras, como El Vestíbulo, As regras do xogo e Hansel, obtendo recoñecementos como o Premio Buero de Teatro Xuvenil á Mellor Obra de Galicia e Mellor obra Nacional en varias ocasións, entre outros.

Un dos seus últimos traballos foi a dramaturxia e dirección escénica de actores no proxecto Endaterra, de Quique Peón. Na actualidade, Susana Crespo continúa desenvolvendo proxectos escénicos que combinan teatro, música e danza, mantendo o seu compromiso coa formación artística e a democratización da cultura.