Territórios de liberdade

ZÉ PAREDES Actor, director e dramaturgo nacido en Guimarães, Portugal, en 1972. Iniciou a actividade profesional en 1997 integrando o elenco fixo do Teatro do Noroeste de Viana do Castelo, traballando con encenadores como José Martins, Jorge Castro Guedes, Xulio Lago, Manuel Guede e Guillermo Hedras. En 2001, na secuencia da co-produción Mar Revolto, entre o Teatro do Noroeste, o Centro Dramático Galego e a Compañía de Teatro de Braga, inicia a súa relación coa Galiza. Primeiro co Teatro do Aquí, como encenador do espectáculo Farois Vermellos; un monólogo coa actriz Mónica Camaño, para continuar máis tarde co Teatro de Ningures na calidade de asistente de escena de Etelvino Vázquez. Entre 2004 e 2007 foi coordinador da Clase de Teatro da Universidade da Coruña. En 2008 estrea con Mónica Camaño a primeira produción da compañía TEATRO NU, actualmente sen actividade. En 2011 foi finalista do Premio Diario Cultural de Teatro Radiofónico coa peza Quendas. En alianza con Xosé Manuel Pacho recibiu o Premio Rafael Dieste de Literatura Dramática o ano 2013 coa peza Teatro, xeitos de cargar un arma. En 2019 gaña o Torneo de Dramaturgia da Mostra Internacional de Teatro Cómico e Festivo de Cangas coa peza Unha baixa. En 2012 asumiu a dirección artística do Teatro do Pichel en Compostela e do Teatro Mar Aberto en Cangas, ambas compañías de teatro de afeccionados.

COMPAÑÍA CERTA A Varazim Teatro é unha Asociación Cultural, con actividade na área do Teatro, fundada en 1997, que ten como misión promover a reflexión sobre temáticas urxentes e socialmente relevantes a través do Teatro. Sendo unha Asociación con múltiples eixes de actuación e intervención como programadora é responsábel da Temporada Teatral na Póvoa de Varzim, desde 1998, e É-Aquí-in-Ócio Festival Internacional de Teatro, desde 2007. Todas as creacións de carácter profesional da Asociación son presentadas (desde 2018) coa sinatura: Compañía Certa. Todo o percorrido, que culmina coa creación da Compañía Certa, presenta unha identidade propia, recoñecida polo público e polos seus pares, asentada na creación de espectáculos de recursos técnicos minimalistas con temáticas de gran intervención social e pescuda de novas formas de relación do espectáculo co público. Ten unha forte conexión coa comunidade, para o cal desenvolve, en sede propia ou en parceria con diversas entidades, talleres de teatro e proxectos coa comunidade, nos que o teatro actúa como ferramenta de desenvolvemento persoal e social. A Varazim Teatro conta 55 creacións teatrais ata 2018. Territórios de Liberdade é a 17ª creación da Compañía Certa.

TANXARINA TÍTERES A compañía TANXARINA TÍTERES foi fundada en 1983, por varios antigos alumnos de Harry Tozer, profesor de construción e manipulación de títeres de corda no Institut del Teatre de Barcelona, e tamén doutros profesionais galegos do teatro infantil. Desde entón converteuse nunha das formacións máis recoñecidas e prestixiosas do teatro galego de monicreques dentro e fóra de Galicia. Dedícase principalmente á produción e distribución de espectáculos dirixidos a todo tipo de público: infantil, xuvenil e familiar; onde se combinan diversas técnicas de animación de monicreques co traballo actoral dos propios titiriteiros. Os títeres de corda, os de luva, os de pau, as sombras chinesas, os bunrakus e outros adquiren así poder expresivo e cómico. Esta relación escénica entre monicreques e actores foi un dos sinais de identidade da compañía dende os seus primeiros espectáculos.
TANXARINA TÍTERES presentou as súas obras nos festivais de teatro de monicreques máis importantes: Segovia, Valencia, Barcelona, Madrid, Murcia, Bilbao, Alacante, Sevilla... Son moitas as cidades visitadas polos seus monicreques que tamén percorreron Portugal, Grecia, Austria, Bélxica, Francia, Italia, O Salvador, Costa Rica, Nicaragua, Venezuela, Cuba, Colombia, Arxentina, Brasil, México... O ano 2000, os actores-manipuladores da compañía inician unha intensa actividade paralela dentro do teatro de actores, sendo frecuentemente convidados a participar tanto en montaxes teatrais (Teatro do Morcego, Produccións Teatrais do Sur, Centro Dramático Galego...) como en varias producións audiovisuais: cine, series de televisión, curtametraxes, publicidade, dobraxe e outras. A Compañía tamén desenvolve unha actividade docente constante, mantendo unha variada oferta de cursos sobre construción e manipulación de títeres, marionetas, máscaras e cabezas para educadores, escolares e profesionais da animación sociocultural. Ademais, desde o ano 2000, TANXARINA TÍTERES é a responsable da dirección artística e técnica do FESTIVAL INTERNACIONAL DE TÍTERES DE REDONDELA. Dende a súa duodécima edición é colaborador habitual do festival, un espectáculo de títeres de gran calidade e recoñecemento cultural que se desenvolve no mes de maio. Actualmente a Compañía está formada por Eduardo Rodríguez Cunha “Tatán” - Fundador; Miguel Borines Fernández- Fundador e Andrés Giraldez Río.