A Xunta impulsa a programación do Centro Dramático Galego en novembro con preto de 60 funcións

A Xunta impulsa durante o mes de novembro a actividade do Centro Dramático Galego cunha intensa programación escénica que suma preto de 60 funcións dentro e fóra de Galicia. O circuíto levará as producións da compañía pública por distintos concellos galegos e a escenarios de Portugal, Romanía e Uruguai.

No ámbito internacional, A gaivota, ensaio aberto regresa desde hoxe ao Teatro El Galpón de Montevideo cun elenco integramente uruguaio e funcións ata o 11 de decembro. Esta coprodución do Centro Dramático Galego con Crémilo, Colectivo 84, o Teatro San Martín de Buenos Aires e o propio Teatro El Galpón ofrecerá 12 representacións, os xoves e venres.

A montaxe tamén participará o 18 de novembro no Festival Interferences de Cluj-Napoca, en Romanía, con dúas funcións a cargo do elenco galego orixinal.

Portugal será outro dos principais destinos da programación. E se o meu corazón parar, coproducida con Temblor Teatro, poderá verse o 7 de novembro no Centro Cultural Raiano de Idanha-a-Nova e os días 13, 14 e 15 na Estufa Fria de Lisboa. Pola súa banda, Auto da Barca do Inferno, coprodución co Teatro Nacional São João, estrearase o 12 de novembro no Porto, onde permanecerá en cartel ata o 13 de decembro cun total de 24 funcións.

O itinerario portugués continuará o día 19 con A serie clopen, coproducida con Pistacatro Productora de Soños, no Theatro Circo de Braga. Nesa mesma xornada, Dolce far niente, coproducida con Desattada e Nononon.lab, presentarase no Teatro Municipal Sá de Miranda de Viana do Castelo dentro do Festival de Teatro da cidade.

En Galicia, unha das principais citas será a estrea absoluta de A culpa, coproducida con Estudo Momento e a Orquestra Sinfónica de Galicia. A adaptación teatral da novela homónima de María Solar, Premio Xerais 2022, representarase os días 7 e 8 de novembro no Teatro Jofre de Ferrol.

Santiago de Compostela acollerá os días 14 e 15 a estrea de No Kings, parte I: Molestia, coprodución coa Associação Cultural Turbina, o Teatro Nacional de Luxemburgo e o Teatro São Carlos de Lisboa. Ademais, o venres 6 representaranse A fortaleza, no Auditorio do Fórum Metropolitano da Coruña, e Costa da Morte, cartografía dun naufraxio, no Auditorio do Centro Cívico de Malpica.

A programación galega inclúe tamén A furia da amanita o sábado 7 no Auditorio Municipal de Vigo; As formas do amor, o domingo 8 na Casa da Cultura A Picota de Mazaricos e o sábado 14 na Casa da Cultura de San Sadurniño; e Memorias dun neno labrego, que continuará a súa xira en Ourense o día 14.

Na segunda metade do mes, E se o meu coração parar chegará o 17 de novembro ao Salón Teatro de Santiago de Compostela no marco das Quintas do Camões. O día 19, Territorio regueifa, coprodución con Ainé Producciones e o FIOT, representarase na Casa da Cultura de Bertamiráns, en Ames. Finalmente, Costa da Morte, cartografía dun naufraxio terá unha nova función o sábado 21 na Casa da Cultura de Corcubión.