Este recurso pedagóxico inclúe un percorrido polos principais espazos teatrais de Galicia (entre eles, o Salón Teatro de Santiago de Compostela, a sede do CDG) e afonda nos elementos que conflúen na posta en escena dunha peza dramática, como as personaxes, a luz ou a escenografía. Ademais, contén actividades creativas para a rapazada e un glosario de termos teatrais

Elaborada ao abeiro do Fondo de Proxectos Culturais Xacobeo 2021, promovido pola Consellería de Cultura, Educación e Universidade, a publicación comeza cun percorrido por diferentes espazos teatrais de Galicia, como o Teatro da Beneficencia de Ortigueira, o Teatro Principal de Ourense, e o Teatro Principal e o Salón Teatro de Santiago de Compostela. Tamén se inclúen o Teatro Jofre de Ferrol, o Teatro Pastor Díaz de Viveiro, o Teatro Rosalía Castro e o Teatro Colón da Coruña, o Teatro Afundación (antigo García Barbón) de Vigo e o Teatro Principal de Pontevedra. Canto ao Salón Teatro, pódese ver unha ilustración do interior na que se identifican as diferentes zonas de oficinas, de camerinos ou o despacho de billetes, entre outras.

A continuación faise un repaso polos principais elementos das representacións, coas personaxes e máscaras; a luz, cunha explicación dos diferentes recursos técnicos utilizados; e a escenografía, tamén coas correspondentes técnicas. Cada unha destas partes recolle actividades creativas para realizar en papel.

O alumnado terá a oportunidade de coñecer como funciona un espazo escénico por dentro, así como de achegarse á historia do teatro profesional galego e á evolución dos oficios teatrais

O CDG abre a convocatoria para o seu programa Os segredos do Salón Teatro. Visitas en en liña ao corazón do teatro, dirixido a centros educativos de Primaria e de Secundaria de toda Galicia. Con motivo da conmemoración do centenario do Salón Teatro, edificio no que ten a súa sede, a compañía pública retoma as súas actividades escolares, adaptándoas á actual situación sanitaria para o seu desenvolvemento de xeito virtual.

Esta proposta está aberta a todos os centros interesados en participar durante o actual curso escolar. A actividade desenvolverase os mércores, cunha duración máxima estimada de 45 minutos.

As solicitudes para participar poden remitirse ao correo electrónico centro.dramatico.galego [at] xunta.gal (centro[dot]dramatico[dot]galego[at]xunta[dot]gal).

Visita virtual

A través dela, os estudantes terán a oportunidade de descubrir que se agocha tras o pano do Salón Teatro, nun percorrido virtual e guiado polo escenario, o peite, os camerinos, a xastrería, a cabina de control e demais espazos que non adoitan abrirse ao público. Buscarase, ademais, a interactividade co alumado para lles dar resposta a todas as curiosidades que poidan xurdir ao respecto do funcionamento dun teatro, a produción dun espectáculo ou os diferentes oficios nel implicados.

Ao tempo, coñecerán de primeira man a evolución experimentada polo edificio nestes 100 anos de vida e, especialmente, tras a súa rehabilitación pola Xunta de Galicia para recuperalo como espazo escénico en 1999. Con tal motivo, ofrecerase tamén unha aproximación á historia do teatro profesional galego, da que o CDG é parte fundamental, lembrando espectáculos, compañías e grandes intérpretes que se subiron ás táboas do Salón Teatro nos últimos vinte anos.

Outro dos obxectivos deste programa é poñer en valor as numerosas profesións artísticas e técnicas que forman parte do ámbito teatral (dirección, interpretación, escenografía, iluminación, son, tremoia, rexedoría, vestiario, produción etc.), incidindo na necesidade de rachar cos roles e cos estereotipos de xénero.
 

O Centro Dramático Galego vén de publicar o caderno pedagóxico para o estudo da obra Neorretranca e Posmorriña, da man de Tamara Andrés (Gálix).

O Centro Dramático Galego vén de publicar o caderno pedagóxico para o estudo da obra Divinas Palabras Revolution, da man de Mª Jesús Madera Seoane e Mª Teresa Leis Rey (GÁLIX).